كشف الممثل اللبناني غبريال يمين، عن تلقيه عرض تمثيل في فيلم عالمي، الا ان "الفيزا" سببّت بتعطّل سفره وبالتالي خسارته الدور، بحسب قوله.
وفي منشور على صفحته عبر
فيسبوك، قال يمين: "كتار كانوا يسألوني: ليه ما بتمثّل برّا بشي فيلم عالمي؟ كنت قلهن: مستحيل! ما بياخدوني...
- ليه...
- يمكن لأني لبناني"، مضيفا: "من شهر تقريبا، وردني اتصال من برا، بيطلبوا مني صوّر حالي بمشهد زغير... قلت لحالي: معقول؟ كيف عرفوا فيي... ما انا لبناني.. وتاني يوم إجاني إتصال:
مبروك، رح تكون معنا بفيلم كتير كبير، مع ممثلين كبار من هودي للي كنت إحلم فيهن ... كمان
مش قادر قول مين حفاظا عا وعد بالسرّية... يا الله ... معقول؟ ... كيف هيك ؟ ما انا لبناني ".
وتابع: "حضروا كل شي وصرت
ناطر هالفيزا تا توصل لطير بأسرع وقت. ما بقى تحمل ... التصوير بيبلّش بعد بكرا، الأحد وبعدني ناطر الفيزا... هني يركضوا هونيك، وانا اركض هون ... وبعد لهلق ما إجت الفيزا"، خاتما كلامه بالقول: "مبارح حكيتني المخرجة، كتير متأثرة، بتتعذر مني انهن رح يضطروا يجيبوا حدا
تاني ، وكلّو كرمال شغلة تافهة إسمها فيزا... انخبطت. قعدت بالسهرة مع صديق وقلتللو: ما عم صدّق ! معقول للي صار ؟ ليش صار فيي هيك ؟ قللي : بلكي لأنك لبناني".