شارك النجم السوري مكسيم خليل صورة عبر حسابه الشخصي على فايسبوك، تظهر أطفال سوريين يبكون. وأرفقها بمقطع عبر فيه عم غضبه ومواقفه السياسية، فكتب:
كيف ممكن نمرق على صورة متل هي ونضل عادي ؟؟.. نقلب الصورة ونكمل مشوارنا الحياتي والمهني..!! شو هالاحساس باليأس يلي وصلناله !! شو هالاحساس باليأس يلي صار معشش جواتك؟! قديش وصلولك انه انت ضعيف و هش و كلمتك مارح تأخر ولا تقدم !!
كيف قدر الظلم يوصلنا لهون!؟ وقديش هو مرتاح ومبسوط انه وصّلنا لهون!؟ تفكر بأكلك و شربك و شغلك يضل ماشي والباقي هاد نصيبو وهيك مكتوب له ..ليش مين الباقي؟ مو نحنا ؟؟مو جزء منا!؟.. شو ماكان السبب ..ووين ماكان الحدث و مين ماكان ..
معقول بدنا نخاف نتعاطف !! معقول بدنا نحسب حساب غضب فئة لانه عمنقول انه كل الناس متل بعضها و بتستحق تعيش بسلام وبأمان!؟ انا مافيني ياجماعة ..سامحوني انا مابقدر ..
سبوني اشتموني قولو شوووو مابدكن ..
ماعمبقدر امرق عادي و أتأقلم و قول شودخلني..
انا ماااااافيني شوف هي الطفلة غير بنتي.. وجها عمشوف محله وجه واحد من ولادي ..بتخيل قديش تعبو الأهل و ربو و حبو مشان بهالبساطة يجي صاروخ يروح كل احلامهم و آمالهم..هي بنتي ويلي جنبا بنتي و يلي ماتو اهلي كل يلي ماتو بدون استثناء اهلي ..مافيني خاف اني أتعاطف ووقف ضد الظلم والقتل..
يمكن تكون مابتقدر تغير شي بواقع عمتتحكم فيه قوى ومصالح كبيرة ..
بس على الأقل ماتخلي هاد الواقع يكسرلك الانسان يلي جواتك و النخوة يلي جواتك .. يطفيلك مشاعرك بأنك تعبر عن ألمك و حزنك و إنسانيتك ..
وتقول بصوت عالي حاااااج قتل ...حراااام هدول الناس ...هدول الاطفال مو ذنبن ..
كتار منكن حزين من جواته بعرف ..بس تخيل انك على الأقل بتقدر تعطي هدول الناس يلي مالن ذنب جرعة امل ..أنهن مارح يموتو منسيين ..
تعو كلنا بصوت واحد نقلن الله يحميكن ..نحنا منخاف عليكن..
نحنا منحبكن .. انتو ولادنا انتو اهلنا انتو اجدادنا وانتو احفادنا ..
ولله لو مابقي غيري على هاد الكوكب رح يبقى قلبي وروحي متعاطفة مع كل سوري على ارض سوريا و مع كل إنسان عمبموت ضحية على هي الارض..
وجماعة انت ممثل بتخسر فانز ..شكراً لجهودكم انا إنسان مابدي اخسر إنسانيتي ..
على الأقل قدام حالي .
#اوقفوا_القتل_في_سوريا