ونشر ياسر العظمة فيديو على حساباته عبر مواقع التواصل الاجتماعي، قال فيه: "منقعد نحن العرب منحكي ومنتسلى ومنثرثر بالسياسة والاقتصاد والتربية وكل شي، وبيتضحلنا أن البلد رح تطير من بين أيدينا ونحن عم نقول لنشوف شو رح يصير"
وأضاف: "بحذرونا من زلزال قادم أو عاصفة هوجاء أو فيضان أو طوفان ونحن عم ننتظر ونقول: لنشوف شو رح يصير، بقولولنا رح نساوي شرق أوسط جديد بقولوها علناً بيدحشوا تمهم بآذاننا وبيصرخوا: رح نساوي شرق أوسط جديد.. نحن منفتح تمنا ومنرخي حنكنا ومنقول: لنشوف شو رح يصير".
وتابع: "بقولولنا رح نعمل صومال جديدة ببلادكم رح نسعى لإيجاد فوضى خلاّقة ونحن عم نقول: ايه لنشوف شو رح يصير".
وأردف: "بهدّدونا بتقسيم بلادنا بقولولنا ها مو لغيرنا جهاراً نهاراً بالصحافة والإعلام المرئي والمقروء والمسموع والأقمار الصناعية وجميع وسائل الإعلام رح نساوي كذا وكذا، بشرحوا خططهم السرّية دون تحفظ ولا مواربة ولا خجل بقلهم رح يخربوا ويدمّروا ويقتلوا ويفجّروا ويسرقوا وينهبوا ويزعزعوا الاستقرار ونحن منقول: ايه لنشوف شو رح يصير".
وختم ياسر العظمة: "مارح يصير أكتر مما صار فات الدب للكرم بمعرفة منا وبعلم وأنتو بتعرفوا بقية الفيلم وإنا لله وإنا إليه راجعون".