تعرض الفنان المصري عمر كمال لموجة من الانتقادات اللاذعة ولحملة تنمر قرر مواجهتها بسبب انتشار صورة قديمة له قبل الشهرة.
وكتب عمر برسالته: " كل ما أحط بوست وممكن الناس تشوف بعنيها عشان محدش يقول ده بيحور و بيعمل بوست وتريند ألاقى ناس كتيرة حطالي صورتي اللى ع اليمين فـ الكومنتات من باب السخرية .. حتى الصورة اللي منزلها لوالدتى وبعبر عن حبي ليها عشان عيد ميلادها منزلين الصورة من باب السخرية .. فا عايز ارد عليهم وأقولهم والله الحمد لله على شكلي فـ جميع مراحل حياتي وديه حاجة انا مش بتكسف منها و اديني نزلت الصورة اهو للناس فـ بوست عشان تشوفها ومش مكسوف .. والصورة اللي ع اليمين ديه لانسان كان معندهوش رفاهية انه يروح للدكتور يتابع معاه رچيم او يروح للچيم او حتى عنده وقت يفكر فـ شكله .. انسان كان كل همه يشوف السرير بعد يومه الطويل عشان يصحى ليوم تاني أصعب .. مش مهم كنت إيه المهم بقيت إيه اشتغلت على نفسي وبكرم وفضل ربنا اشتغلت الحاجة اللي بحبها .. وركبت العربية اللى بحلم بيها .. وكونت نفسى .. وعملت وضع واسم لنفسي .. وربنا جعلني سبب فـ اني شايل مسئولية ناس وفاتح بيوت ناس كتير من غير جنيه من بابى ومامى ولا مساعدة حد غير ربنا ثم دراعي .. أشك لو انت انسان عندك حاجة مفيدة ف حياتك تعملها او عندك هدف فـ حياتك ان يبقى عندك وقت تدور على صور حد وتسخر منه .. صدقني الحياة مفيهاش وقت تضيعه فـ الكلام ده شوف حاجة أفيد واعمله".
